Britannica School
Sut i ddefnyddio Britannica i chwilio yn ddiogel.
Trosolwg
Mae Britannica School yn rhoi mynediad i ysgolion at erthyglau digidol, bywgraffiadau, delweddau, fideos a chynnwys rhyngweithiol o ansawdd uchel, dibynadwy. Drwy Hwb, mae gan bob ysgol a gynhelir yng Nghymru fynediad at Britannica School.
Gall ymarferwyr ac arweinwyr ysgolion archwilio adnoddau Britannica School a recordiadau Gŵyl Digi Hwb i gael cymorth cam wrth gam a gwybodaeth ar sut i’w ddefnyddio’n ymarferol.
Mae Britannica School yn darparu cynnwys ar wahanol lefelau darllen:
- sylfaen: argymhellir ar gyfer 8 i 11 oed
- canolradd: argymhellir ar gyfer 11 i 14 oed
- uwch: argymhellir ar gyfer 14 i 18 oed a hŷn
Sut i gael mynediad at Britannica School yn Hwb
Mewngofnodwch i wefan Hwb a chliciwch ar ap Britannica Education ar ddangosfwrdd Hwb. Mae'r dudalen hon yn rhoi mynediad i ddysgwyr ac ymarferwyr i Britannica School a Britannica ImageQuest.
Mae hefyd yn bosibl chwilio'n uniongyrchol am gynnwys o Britannica School yn yr ardal Adnoddau ar Hwb.
Gosodiadau iaith
Ar hyn o bryd dim ond yn Saesneg y mae rhaglenni Britannica School ar gael. Wrth edrych ar erthygl, gall ymarferwyr a dysgwyr glicio ar y botwm cyfieithu a dewis eu hiaith.
Sut y gall Britannica School gefnogi ysgolion
- Darparu cynnwys digidol o ansawdd uchel am ystod eang o themâu a phynciau cyffredin i wella addysgu a dysgu ar draws y Cwricwlwm i Gymru.
- Datblygu sgiliau ymchwil, gwirio ffeithiau a meddwl beirniadol dysgwyr.
- Darparu mynediad at ffynonellau ychwanegol o gynnwys dibynadwy fel cyfnodolion, e-lyfrau, newyddion a ffynonellau cynradd eraill.
- Darparu amgylchedd diogel, wedi'i hidlo ar gyfer ymchwil ar-lein.
- Gwella hygyrchedd trwy nodweddion fel Darllen yn Uchel, lefelau darllen y gellir eu haddasu a chefnogaeth weledol.
- Helpu i ddatblygu llythrennedd digidol trwy offer dyfynnu parod a ffynonellau gwybodaeth strwythuredig.
- Yn cynnwys offer ar gyfer gosod tasgau ymchwil ac aseiniadau i Google Classroom neu Microsoft Teams yn uniongyrchol o fewn y platfform.
Ystyriaethau allweddol
Dylid defnyddio Britannica School yn unol â pholisïau ehangach yr ysgol megis:
- llythrennedd digidol
- diogelwch ar-lein
- defnydd derbyniol
- diogelwch
- diogelu data
Wrth ddefnyddio Britannica School, dim ond yn yr iaith Saesneg y gellir cynnal chwiliadau ar hyn o bryd.
Mae Britannica School yn cynnwys nodweddion hygyrchedd i gefnogi pob dysgwr. Mae'r rhain yn cynnwys:
- offeryn "Darllen yn Uchel" (“Read Aloud”) sy'n adrodd erthyglau
- opsiwn ffont "OpenDyslexic" wedi'i gynllunio i wella darllenadwyedd i ddysgwyr â dyslecsia
Sylwch nad yw'r nodwedd Darllen yn Uchel yn ddibynadwy ar hyn o bryd ar gyfer cynnwys Cymraeg.
Wrth edrych ar erthygl, delwedd, fideo, cyfnodolyn ac ati mae dewis yr opsiwn "Cadw" yn annog y defnyddiwr i greu cyfrif personol. Gall ymarferwyr ddefnyddio eu cyfeiriad e-bost Hwb i greu cyfrif. Gall dysgwyr greu cyfrif heb roi cyfeiriad e-bost. Os yw dysgwr yn anghofio ei fanylion mewngofnodi, bydd angen i ymarferydd gysylltu â Britannica am gais i ailosod cyfrinair.
Sicrwydd data
Dylai ysgolion ystyried:
- a oes angen Asesiad o'r Effaith ar Ddiogelu Data (DPIA) newydd
- neu a ddylid diweddaru eu DPIA presennol
Nid yw Britannica Education yn defnyddio nac yn storio gwybodaeth bersonol na data dysgwr. Mae rhyngweithiad pob defnyddiwr â Britannica yn annibynnol ac yn breifat. Am fwy o wybodaeth am gydymffurfiaeth Britannica â deddfau a rheoliadau preifatrwydd data, cyfeiriwch at Britannica Education Privacy Policy Notice. Mae hyn yn cynnwys y rhai sy'n gysylltiedig â data dysgwyr.
Nid yw Britannica Education yn defnyddio data dysgwyr ar gyfer hysbysebu neu farchnata wedi'i dargedu, nac yn gwerthu data i drydydd partïon.
Gellir cyfuno Britannica Education gydag offer fel Microsoft Teams a Google Classroom. Dylai ysgolion sicrhau eu bod yn deall sut mae data dysgwyr yn cael ei drin wrth gyfuno rhaglenni fel hyn.