English
Hwb

Mewngofnodi i Hwb o bell: Y broses ddilysu aml-ffactor

Sut i osod cyfleuster dilysu aml-ffactor i fewngofnodi i Hwb pan nad ydych yn eich ysgol neu'ch gweithle.

Mae dilysu aml-ffactor yn osodiad diogelwch ar bob cyfrif nad yw'n perthyn i ddysgwr. Nid oes angen i ddysgwyr ddefnyddio cyfleuster dilysu aml-ffactor. Rhaid i unrhyw un arall osod y cyfleuster cyn y gallant fewngofnodi y tu allan i'w rhwydwaith dibynadwy.

Mae angen ichi fewngofnodi i rwydwaith dibynadwy eich ysgol neu'ch gweithle er mwyn gosod cyfleuster dilysu aml-ffactor am y tro cyntaf. Ni allwch ei osod o bell.

Ar ôl ichi osod cyfleuster dilysu aml-ffactor, gallwch fewngofnodi i Hwb y tu allan i'ch gweithle drwy nodi eich:

  • enw defnyddiwr
  • cyfrinair
  • cod a gynhyrchir gan ap Microsoft Authenticator

Sut i roi'r broses ddilysu aml-ffactor ar waith

Mae'n rhaid ichi gwblhau'r camau canlynol mewn un sesiwn ac yn y drefn ganlynol.  Peidiwch â chau nac anwybyddu sgriniau.

  1. Mewngofnodwch i rwydwaith dibynadwy eich gweithle.
  2. Lawrlwythwch ap Microsoft Authenticator o'r storfa apiau. Mae angen ichi ei lawrlwytho i ffôn clyfar neu lechen y gallwch eu defnyddio oddi ar y safle ac sy'n caniatáu mynediad i'r rhyngrwyd.
  3. Cysylltwch ap Microsoft Authenticator â’ch cyfrif Hwb.

Sut i gysylltu ap Authenticator â’ch cyfrif Hwb

  1. Mewngofnodwch i Hwb ar ddyfais wahanol i'r un y mae ap Microsoft Authenticator wedi'i lawrlwytho iddi. Er enghraifft, mewngofnodwch i Hwb ar liniadur neu gyfrifiadur bwrdd gwaith, ac agor ap Microsoft Authenticator ar eich ffôn clyfar.
  2. Ar liniadur neu gyfrifiadur bwrdd gwaith sydd wedi'i gysylltu â rhwydwaith eich ysgol neu rwydwaith dibynadwy arall, ewch i https://mysignins.microsoft.com/security-info a mewngofnodi gyda'ch enw defnyddiwr a'ch cyfrinair Hwb.
  3. Ar dudalen Gwybodaeth ddiogelwch, cliciwch ar + Ychwanegwch ddull mewngofnodi.
  4. O'r ddewislen, dewiswch Ap Authenticator.
  5. Cliciwch ar Ychwanegu a dilynwch y cyfarwyddiadau ar y sgrin nes ichi gael y neges Wedi llwyddo i gofrestru ap Microsoft Authenticator.

Ar ôl ichi osod cyfleuster dilysu aml-ffactor, gallwch fewngofnodi i'ch cyfrif Hwb o bell, gan ddefnyddio eich enw defnyddiwr, eich cyfrinair a chod a gynhyrchir gan ap Microsoft Authenticator.

Mewngofnodi i Hwb gan ddefnyddio cyfleuster dilysu aml-ffactor

Bob tro y byddwch yn mewngofnodi i Hwb y tu allan i rwydwaith dibynadwy eich gweithle, rhaid ichi nodi'r cod unigryw a gynhyrchir gan ap Microsoft Authenticator.

  1. Mewngofnodwch i Hwb.
  2. Agorwch ap Microsoft Authenticator ar eich dyfais.
  3. Rhowch y rhif 2 ddigid a welwch ar dudalen fewngofnodi Hwb yn ap Authenticator.
  4. Bydd tudalen fewngofnodi Hwb yn cwblhau'r broses fewngofnodi yn awtomatig.

Os yw hysbysiadau gwthio wedi'u galluogi ar eich ap Microsoft Authenticator, gofynnir ichi'n awtomatig i nodi'r rhif a ddangosir ar dudalen fewngofnodi Hwb.

Newid o god 6 digid i nodi rhifau

Os gwnaethoch osod cyfleuster dilysu aml-ffactor cyn Tachwedd 2023, efallai eich bod yn defnyddio cod 6 digid i fewngofnodi. Gallwch ddewis dechrau defnyddio'r dull cyflymach a haws o nodi rhifau.

  1. Ar liniadur neu gyfrifiadur bwrdd gwaith, ewch i https://mysignins.microsoft.com/security-info a mewngofnodi gyda'ch enw defnyddiwr a'ch cyfrinair Hwb.
  2. Ar dudalen Gwybodaeth ddiogelwch, cliciwch ar + Ychwanegwch ddull mewngofnodi.
  3. O'r ddewislen, dewiswch Ap Authenticator.
  4. Cliciwch ar Ychwanegu a dilynwch y cyfarwyddiadau ar y sgrin nes ichi gael y neges Wedi llwyddo i gofrestru ap Microsoft Authenticator.

Y tro nesaf y byddwch yn mewngofnodi i Hwb y tu allan i rwydwaith dibynadwy eich ysgol neu'ch sefydliad, gofynnir ichi nodi rhifau drwy'r dull hwn fel eich ail ffactor.

Ailosod cyfleuster dilysu aml-ffactor os byddwch yn cael ffôn clyfar neu lechen newydd

Os byddwch yn newid eich ffôn clyfar neu'ch llechen, rhaid ichi ailosod cyfleuster dilysu aml-ffactor. Cysylltwch â gweinyddwr Hwb yn eich ysgol neu'ch sefydliad a fydd yn gallu dilyn y canllawiau isod.

Canllawiau i weinyddwyr Hwb ar ailosod cyfleuster dilysu aml-ffactor ar gyfer cyfrifon nad ydynt yn perthyn i ddysgwyr

Gall gweinyddwyr Hwb mewn ysgol neu sefydliad ailosod cyfleuster dilysu aml-ffactor ar gyfrifon unigolion nad ydynt yn ddysgwyr drwy Borth Rheoli Defnyddwyr Hwb:

  1. Mewngofnodwch i Hwb.
  2. Cliciwch ar Rheoli defnyddwyr.
  3. Ar eich Dangosfwrdd gweinyddwyr, cliciwch ar Gweld defnyddwyr: Gweld staff (neu Gweld pencampwyr digidol neu Gweld llywodraethwyr neu Gweld unigolion nad ydynt yn rhan o’r system gwybodaeth reoli).
  4. Defnyddiwch Chwilio term i ddod o hyd i’r defnyddiwr perthnasol, e.e. teipiwch gyfenw'r defnyddiwr a chlicio ar y botwm Chwilio.
  5. Cliciwch ar y botwm Gweld y manylion ar yr ochr dde.
  6. Cliciwch ar Rheoli defnyddwyr: Ailosod yr opsiwn dilysu aml-ffactor.
  7. Darllenwch y neges ar y sgrin: “Ydych chi'n siŵr eich bod am ailosod yr opsiwn dilysu aml-ffactor ar gyfer [enwdefnyddiwr]@hwbcymru.net?” Cliciwch ar y botwm Parhau i fynd ymlaen.
  8. Cynghorwch y defnyddiwr i ddilyn y cyfarwyddiadau i lawrlwytho ap Microsoft Authenticator a'i gysylltu â'i gyfrif Hwb.
  9. Os oes gennych unrhyw gwestiynau neu os oes angen cymorth arnoch, dilynwch eich trefniadau cymorth TG lleol yn yr ysgol neu cysylltwch â'ch awdurdod lleol yn y lle cyntaf. 

Os oes angen cyngor ac arweiniad arnoch o hyd, gallwch gysylltu â Desg Wasanaeth Hwb: e-bostiwch cymorth@hwbcymru.net neu ffoniwch 03000 25 25 25.

Os cewch gynnig i ddefnyddio cyfleuster dilysu aml-ffactor tra byddwch wedi cysylltu â'ch rhwydwaith dibynadwy

Ni ddylech gael cynnig i ddefnyddio cyfleuster dilysu aml-ffactor wrth fewngofnodi i Hwb tra byddwch wedi cysylltu â rhwydwaith dibynadwy eich ysgol neu'ch sefydliad. 

Os bydd hyn yn digwydd, cysylltwch â Desg Wasanaeth Hwb: e-bostiwch cymorth@hwbcymru.net neu ffoniwch 03000 25 25 25 a rhowch gyfeiriad IP allanol eich ysgol neu'ch sefydliad iddynt.

Os nad ydych yn siŵr o gyfeiriad IP allanol eich ysgol neu'ch sefydliad, cysylltwch â'ch darparwr cymorth TG a fydd yn gallu rhoi'r wybodaeth hon ichi. 

Rhagor o adnoddau

  • Diweddarwyd ddiwethaf 02 Mehefin 2025