Canllaw microflogio

Cynnwys

Mae postiadau, delweddau a fideos ar blatfformau microflogio yn cael eu creu’n gyfan gwbl gan y defnyddiwr. Mae hyn yn golygu y gall pobl ifanc ddod ar draws cynnwys amhriodol neu sarhaus. 

Mae microflogiau yn aml wedi’u cynllunio i hyrwyddo cynnwys sy’n ennyn llawer o ddiddordeb. Os yw defnyddwyr eraill yn ymateb neu’n gwneud sylwadau ar y postiadau sarhaus hyn i leisio pryder, yna gallai’r cynnwys gael ei hyrwyddo ymhellach ar y platfform. 

Gall algorithmau ar ficroflogiau hefyd roi defnyddwyr mewn ‘swigod hidlo’. Mae hyn yn golygu mai dim ond cynnwys (gan gynnwys gwleidyddiaeth a newyddion) sy’n adlewyrchu eu diddordebau a’u barn eu hunain, fyddan nhw’n ei weld. Gallai hyn wneud defnyddwyr yn llai tebygol o weld cynnwys sy’n hyrwyddo safbwyntiau gwahanol.

Nid yw cymedroli ar ficroflogiau bob amser yn gyson. Mae hyn yn golygu fod cymedroli yn cael ei adael i ddefnyddwyr unigol, yn hytrach na thimau cymedroli, i adnabod a herio camwybodaeth. Mae’n bwysig i bobl ifanc feddwl yn feirniadol am bethau maen nhw’n eu gweld neu eu darllen ar-lein.

Cysylltu ag eraill

Yn gyffredinol, mae microflogiau wedi’u cynllunio i ganiatáu i ddefnyddwyr rannu eu meddyliau yn rhydd gyda chynulleidfa ar-lein. Mae hyn yn golygu y gallan nhw gysylltu’n hawdd â defnyddwyr anhysbys eraill, sy’n cynyddu’r risg o ddod i gysylltiad â:

• bwlio ar-lein
• casineb ar-lein
• cynnwys amhriodol neu sarhaus
• sgamiau ar-lein 
• meithrin perthynas amhriodol ar-lein

Ymddygiad defnyddwyr

Gallai’r pwyslais ar greu postiadau byr a chyflym olygu nad yw defnyddwyr yn ystyried yn llawn:

• beth maen nhw’n ei bostio
• yr iaith maen nhw’n ei defnyddio

Mae hyn yn golygu y gall pobl eraill gamddehongli postiadau sy’n llawn bwriadau da. Gall hyn arwain at ryngweithio niweidiol neu amhriodol, neu aflonyddu, gan ddefnyddwyr eraill. Os bydd post yn mynd yn feiral, gallai’r crëwr fod mewn perygl o golli rheolaeth o’r cynnwys gwreiddiol a bostiwyd.

Gwnewch yn siŵr bod eich plentyn yn deall y gall unrhyw beth mae’n ei bostio ar ficroflogiau gyfrannu at ei ôl-troed digidol.

Dyluniad, data a chostau

Mae microflogiau wedi’u cynllunio i ddal sylw defnyddwyr a’u cadw er mwyn iddyn nhw barhau i ymwneud â’r platfform. Mae algorithmau ar y platfformau hyn yn gwthio cynnwys newydd yn gyson sydd wedi’i gynllunio i apelio at ddiddordebau a bydolwg y defnyddiwr.

Gall platfformau microflogio hefyd ddefnyddio nodweddion a hysbysiadau sgrolio diddiwedd. Mae’r nodweddion hyn wedi’u cynllunio i wneud y mwyaf o faint o amser mae defnyddwyr yn ei dreulio ar yr ap, a pha mor aml maen nhw’n dychwelyd at yr ap. Gwnewch yn siŵr bod eich plentyn yn gallu sylwi pan fydd yn sgrolio’n ddiddiwedd.

Mae microflogiau yn casglu symiau helaeth o ddata personol. Mae’r data hwn wedyn yn cael ei rannu gyda hysbysebwyr a’u partneriaid sy’n ei ddefnyddio i ddangos hysbysebion wedi’u targedu i ddefnyddwyr.

Gall rhai platfformau microflogio hefyd gynnwys nodweddion nad oes eu hangen i ddefnyddio’r platfform, megis:

• hyrwyddiadau ar gyfer cynlluniau tanysgrifio premiwm
• nodweddion prynu eraill

Gall dylanwadwyr ar ficroflogiau:

• hyrwyddo cynhyrchion neu frandiau penodol
• rhannu dolenni i siopau ar-lein